Im 1954 het de Otto Brügger ds Gùrli chene chùùffe. Mit de Zytt het är verschideni Ùm- ù Aabuute gmacht. Ù so isch de Hüenerstau z‘ù de hüttigi Gaschtstùba ùmbbue cho. Allerlei Materiau het är mit zwüüne Ross wùy gfuget. De Jöggù isch as gmüetlichs Ross gsyy, wa aube ganz aliinig düre fiischter Waud hiim trappet isch, ù fùr d‘Mäda isch ki Lascht z schweeri gsyy. Ù asoo isch füür ù pfüür das aut Hüttli zùm wùnderschööne Bäärghuus gwachse. Ottos Buebe ù d Miitlini sy vùu i ds Gùrli wùy ù ùf Plaffeye ay gschlappet ù hii tatchräftig aapackt, wos epa graad epis z tüe ggää het. D Straas isch vo 1968 bis 1972 bbueni cho. Denaa het Ruedi, de Bueb va Otto, ds Gùrli ùbernoo. Vùu z‘früü, im 1980, isch Ruedi gstoorbe. Asoo hii Otto ù ds Marie de Betrieb bis im 1989 wytergfüert bis ds Hanny ùbernoo het. Im 1997 hetes d Erschliessig vam Stroom ggää, devoor het si mit Houz, Gaas u Generator müsse z‘cheer cho. Abum 2002 isch o de Bueb vam Hanny Mitbsitzer gsyy. Är isch handwärklich begabt gsyy u het mehreri Aarbiite wa angstane sin gmacht. So wie de Umbuu vade Chùchi, vam Raclettestùbli, de Buu vam Chalet, d Parklpatzerwiterig, d Sanierig vam Pschüttloch u no vùu meh.. Im 2017 hii de Simon ù d Anita de Betrieb ùbernoo. Im 2018 isch d Sanierig va de Gurlistraas scho i vollum gang gsi. Bi Brüggers isches bekannt as si handwärklich begabt sin, u so het o Simon sehr vùu säuber chene mache, wie Sitzbänk für d‘ Wanderer, de Brünetroog, d‘Ryttigampfa, Veloständer mite Stroomsüüle u no vùu meh. Ds Tach het gruune, drum himer im 2020 a Tachsanierig brucht. De grossa Houztüsch näbenusse isch o verkiht, as het a nüa gä. As grosses vergält‘s Gott a alli Familiemitglieder u Fründe wa üs mit Früüd si chu häufe. Alli Generatione wa bis iz druf gsi sin, hi a hufe Häärzbluet drin ta. A huufe Arbiite si i dene 7 Jaar vollbracht cho, mitum Gùrli hetmu ging z tüe. Im 2024 het a nüi Ära angfange für Marcel Beyeler, a Boltiger, wa a de Gschücht vam Gùrli tuet witerschriibe. Für di zweiti Saison het är d Chüehlig vam Chäller ernüeret sowie ds Triichebüffe u ide Chùchi hettis a nüi Abwäscherii gä. De Vorplatz het o a Erfrüschig brucht. Asoo hetmu ùmmi mengs chene optimiere.